Лидерот на центристичката Либерална партија, Илие Болојан, денеска стана привремен претседател на Романија, откако стапи во сила оставката на актуелниот претседател на земјата, Клаус Јоханис.

55-годишниот Болојан, кој беше актуелен претседател на Сенатот, ја презема функцијата од колегата-центрист Клаус Јоханис, кој поднесе оставка од функцијата претседател на Романија пред два дена, откако опозициските партии најавија дека ќе бараат негово отповикување.

Пратениците од крајната десница сега планираат да поднесат барање за недоверба на владата на широката коалиција, која има тесно мнозинство во парламентот и ја вклучува Либералната партија на Болојан, јави „Ројтерс“.

Како привремен претседател, Болојан ќе го именува новиот премиер доколку падне актуелната влада. Претседателскиот мандат на Јоханис истече минатата година, а претседателските избори одржани во ноември беа поништени со контроверзна одлука на Уставниот суд на земјата во декември, со образложение дека на изборите влијаела Русија. Судот наложи изборниот процес да се повтори во целост.