Родителите чии деца загинаа во трагичниот пожар во Кочани утрово дојдоа во Институтот за судска медицина на средба со директорот од кого бараат одговори за токсиколошките анализи што се правени и дали се испитувало присуство на цијанид во крвта.

Сите влегоа во Институтот за да бараат информации од што точно починале нивните деца.

На 14 јануари родителите доставиле барање до Институтот за судска медицина во кое прашуваат дали институтот правел токсиколошки анализи и дали испитувале присуство на цијанид, но одговор не добиле до денеска.

Уште пред четири месеци тие побарале итна средба со претставници од Судска медицина, но добиле само една колективна средба на која директорот им ветил детални образложенија на секој од нив поединечно, што според Наунов не се случило.

-Зошто правевте обдукција ако не е завршена работата целосно, кого штитите? Државата ли, институциите ли, министерствата ли? Ова е прашање на човечност, професионалност и одговорност кон семејствата кои изгубија сè. Ова е неприфатливо сокривање информации од семејства кои имаат право на вистина. Ако наредните 3 дена не добиеме писмен сеопфатен одговор, ќе дојдеме пред Судска медицина и нема да си одиме додека не ни ја дадете вистината што ни ја должите – изјави претседателот на Здружението на граѓани „16 март 2025“, Александар Наунов.