Пелистер во последното 33 коло ќе игра пред својата публика и ќе се обиде да ги подобри своите шанси во борбата за опстанок во Првата македонска фудбалска лига. Единствен ривал на битолските „зелено-бели“ е АП Брера, со која минативе кола се ротираа на осмото и деветтото место од табелата, а тоа има важност за тоа кој со кого ќе игра во баражот за опстанок во лигата.

На хартија, АП Брера игра со „фенерџијата“ Шкупи и има релативно полесно задача за да освои три бода, додека Пелистер го пречекува Башкими.

– Уште еден тежок натпревар за нас, како и секој претходен, со голем психолошки товар. Башкими е тим составен од искусни фудбалери кои имаат настапувано во повеќе прволигашки тимови. Минатата година изборија место во ПМФЛ и успеаја да завршат над повеќе тимови со долга прволигашка традиција. Ние сѐ уште го немаме изборено опстанокот и мораме да продолжиме дисциплинирано во претстојните мечеви, како со Башкими, така и во баражот што ни претстои – вели тренерот на Пелистер, Марјан Секуловски.

Подиректен е играчот на битолскиот клуб, Марјан Ристовски – Швајц, кој посакува позитивна атмосфера во пресрет на баражот, а со една цел нивните навивачи и следната година да ги бодрат во ПМФЛ.

– Последен натпревар од првенството. Одиме на победа и три бода, позитивно да влеземе во баражот, со позитивни мисли. Битола и догодина повторно да гледа прволигашки фудбал – рече Ристовски.

Во двата дуели од оваа година, Башкими славеше – прво во Битола со 2:1, а потоа и на домашен терен со 1:0. Претходно, Пелистер ги има добиено двата меѓусебни дуели од Втората македонска фудбалска лига во сезоната со23/24. Натпреварот ќе се игра со почеток од 16.30 часот на стадионот „Петар Милошевски“.