Кина внимателно следи како претседателот Доналд Трамп се залага за дипломатско решение за војната на рускиот претседател Владимир Путин во Украина, предупреди републиканскиот сенатор Линдзи Греам во интервју за Ен-би-си.

„Ако заврши (конфликтот) на начин што ќе изгледа како Путин да е пренаграден, тогаш Тајван е во игра“, рече Греам, предвидувајќи нова жаришна точка во Пацификот.

Најновиот план на Трамп за ставање крај на војната, по повеќе од шест месеци од неговиот нов мандат, ќе го одведе на средба со Путин во Алјаска овој петок. Тоа ќе биде прв пат рускиот претседател да стапне на американска почва по речиси една деценија, објави Политико.

Дипломатската иницијатива на Трамп дојде откако Путин му го презентираше на својот специјален пратеник Стив Виткоф предлогот за прекин на огнот, при што Трамп реагираше позитивно, велејќи дека „ќе има одредена размена на територија во корист на двете страни“ во мировните преговори.

Во саботата наутро, украинскиот претседател Володимир Зеленски категорично ја отфрли идејата дека Киев би можел да отстапи територија во преговорите за запирање на борбите.

Греам, кој за Ен-би-си изјави дека се надева оти „Зеленски може да биде вклучен во процесот“, нагласи дека другите елементи од мировните преговори ќе одредат дали договорот има смисла за Украина и нејзините партнери.

„Како би изгледал еден добар договор? Да се осигури дека 2022 година нема да се повтори“, рече тој, осврнувајќи се на почетокот на сегашната војна. „Под Бајден и Обама, Русија врши инвазија. Целта за мене, а мислам и за претседателот Трамп, е да се стави крај засекогаш. Сега, како би изгледало тоа? Ќе има некои размени на територии, но само откако ќе имате безбедносни гаранции за Украина дека Русија ќе биде спречена да го стори ова повторно.“

Кина, голем купувач на руска нафта, е на ум на претседателот, рече Греам, неколку дена откако Белата куќа објави дека царините за Индија ќе се зголемат на 50% поради потрошувачката на нафта во Русија.

„Тука сум да ви кажам дека претседателот Трамп ќе ја заврши оваа војна на начин што ќе спречи трета инвазија, а не да ја искуша Кина да го земе Тајван“, забележа Греам. „Нашата цел не е да го понижиме Путин, нашата цел е да постигнеме договор за да се осигураме дека нема да има трета инвазија.“