Реновиран амфитеатарот на Детската клиника за студентите по педијатрија
Студентите од Медицинскиот факултет во Скопје од денеска предавањата на Катедрата за Педијатрија ќе ги следат во целосно реновираниот амфитеатар.
На денешното отворањето свои обраќања имаа проф. д-р Соња Топузовска, декан на Медицинскиот факултет во Скопје, проф. д-р Аспазија Софијанова, директор на Детската Клиника во Скопје и проф. д-р Соња Бојаџиева, раководител на Катедрата за педијатрија.
Амфитеатарот се наоѓа во просториите на Детската клиника – Скопје. Неговото реновирање опфати целосна реконструкција на клупите, столовите, подовите и плафоните, како и на техниката за одржување настава.
Со ова реновирање целосно се подобрени условите за одржување настава по предметот Педијатрија за студентите и специјализантите на Медицинскиот факултет во Скопје.