Филмот „Dune“ доминираше на синоќешното доделување на наградите на Британската филмска академија (БАФТА) кои се одржуваа во Ројал Алберт Хол во Лондон, но филмовите и гламурозните тоалети паднаа во сенка имајќи предвид дека во Украина беснее ужасна војна.

ГАЛЕРИЈА | Доделени филмските награди BAFTA: „The Power of Dog“ е најдобар филм на годината

Наградите БАФТА не се одржаа минатата година поради пандемијата на коронавирусот, а оваа година беа организирани токму на време за војната во Европа. Затоа не е чудно што актерите решија јавно да ја поддржат Украина и да испратат порака до рускиот претседател Владимир Путин.

Тоа најјасно го направи австралиската актерка Ребел Вилсон, која оваа година беше во улога на водителка на доделувањето на наградите. Вилсон покажа среден прст во воздух за рускиот претседател.

„Во овој настап имаме двајца преведувачи на знаковен јазик, едниот покажува американски знаковен јазик, додека другиот е задолжен за британскиот. За среќа, на сите знаковни јазици ова е порака за Путин“, рече таа, кревајќи го средниот прст, а публиката ја награди со громогласен аплауз.

Познатиот актер Бенедикт Камбербач рече дека планира да обезбеди дом за украинските бегалци.

„Страдењето на милиони луѓе не може да се игнорира“, изјави тој за „Sky News“, додавајќи дека страдаат наши браќа и сестри. „Навистина е шокантно да се биде Европеец два и пол часа оддалечен од Украина со авион, тоа постојано виси над нас“, рече тој, додавајќи дека мета се цивили кои умираат, милиони останаа без покрив над главата, без струја, без вода и без храна. „Сите ние треба да направиме повеќе отколку само да носиме беџови. Треба да донираме, да ги притискаме нашите политичари да создадат безбедна средина за бегалците“, рече тој.