Реакција на АВМУ за недоличното однесување кон новинарка од страна на директорот на топланата Скопје – Север

АВМУ. / Фото: Архива на Слободен печат

Агенцијата за аудио и аудиовизуелни медиумски услуги најостро го осудува недоличниот однос на директорот на топланата Скопје-Север, Куштрим Рамадани кон новинарката Катерина Додевска на порталот „МКД.мк”.

-Упатувањето вулгарни навреди во ниту еден случај не смее да биде начин на комуникација на носителите на јавни функции, затоа што со самото прифаќање на позицијата нивната работа е предмет на надзор на јавноста и на потенцијално силна јавна критика преку медиумите. Истовремено тие треба да бидат свесни дека имаат одговорност за секој искажан збор и дека мора да се воздржат од секаков вид недолична и непримерна комуникација, соопштува Агенцијата.

Оттаму нагласуваат дека попречувањето на работата на новинарите претставува загрозување на слободата и правото на информирање.

-Неопходно е на медиумските работници да им се овозможи професионално да си ги извршуваат своите обврски, пред се, имајќи ја предвид нивната улога во отворањето прашања од јавен интерес и обезбедувањето транспарентност и одговорност на политичките и јавните органи, нагласуваат од АВМУ.

Реакцијата на АВМУ доаѓа откако директорот на топланата Скопје-Север, Куштрим Рамадани со пцости ја навредуваше новинарката Катерина Додевска која уредно и коректно му побара одговори на неколку прашања во врска со снабдувањето со топлинска енергија на жителите во овој дел од Скопје.

Видео на денот