Различна храна одговара на различни типови луѓе
Веќе илјада години наназад традиционалната кинеска медицина го набљудува човековиот организам со филозофија од пет елементи. Меѓу елементите од кои е содржана кинеската медицина и начини на лекување, почесно место зазема начинот на исхрана со која луѓето превенираат појава на одредени заболувања, но и со различните видови храна се обидуваат да се излекуваат.
Токму исхраната која е базирана на петте елементи се смета дека може да има лековито и превентивно дејство, доколку по принципот на Јинг и Јанг се приспособи на различните типови луѓе. Тоа во никој случај не значи дека треба да почнете да јадете исклучиво кинеска храна, туку дека треба вашата секојдневна исхрана умешно да ја прилагодите спрема потребите, сè со цел да се чувствувате подобро и да превенирате појава на одредени посериозни заболувања.
Во циклусот на елементите
Во кинеската медицина човечките органи, бојата, мирисот и емоциите се гледаат низ призмата на петте кинески елементи, а тоа се: дрвото, огнот, земјата, металот и водата. Истата поделба важи и за намирниците. Во исто време сите намирници имаат свои термички особини и способност да ладат, да загреваат или пак да бидат неутрални. Сето тоа помага организмот да успее повторно да се врати во рамнотежа, доколку се разбира веќе дошло до одредено заболување, или во обид да се превенира кон појава на одреден тип заболување.
Оган
Доколку вашите омилени јадења имаат горчлив вкус, вие сте од оној тип луѓе што спаѓаат во елементот оган. Со ваквиот начин на исхрана, вие без да бидете свесни за тоа, превенирате појава на посериозни заболувања на срцето како и на тенкото црево. За вашата исхрана според кинеската медицина се препорачува постојано да вклучувате намирници од типот на јагнешко и овчо месо, овчо сирење, босилек, рузмарин, маточина, сикорија, рукола како и пиво.
Земја
Благото и слаткото ви се омилени, што значи дека вие сте во елементот на земјата. Со ваквиот вид храна вие превенирате појава на потешки заболувања на панкреасот и на желудникот.
Според овој вид народна медицина, праската, морковот, компирот, крушата, јунешкото месо, авокадото, краставицата, медот и мангото, секојдневно треба да бидат сервирани на вашата трпеза.
Метал
Доколку сакате да јадете луто, тогаш вие припаѓате на елементот метал. Со јадењето екстремно лута храна, според кинеската медицина, вие успешно се справувате со појавата со одредени посериозни заболувања на белите дробови и дебелото црево.
За вас, препорачливи намирници се карито, ѓумбирот, кромидот и лукот, власецот и ротквиците.
Вода
Обожавате солена и зачинета храна, значи вие сте во елементот на вода. Со консумирањето посолени јадења, вие имате потреба од дополнителни количества вода, што па од друга страна позитивно им влијае и ги прочистува бубрезите и бешиката.
За овој тип луѓе се препорачува пармезан, морски ракчиња, маслинки и минерална вода.
Совети на кинеската медицина
Според приврзаниците на традиционалната кинеска медицина, најважно од сè е да јадете здрава, термички необработена и хемиски нетретирана храна. Мастите, белковините и јаглехидратите (кои припаѓаат во елементот земја) многу тешко се варат. Киселото, лутото и соленото, пак, му помагаат на телото да ги искористи сите расположливи хранливи состојки. Сето она што желудникот и панкреасот не можат да го преработат, се апсорбира и се таложи во организмот и останува неискористено. Доколку сакате да го спречите тоа, обидете се да се придржувате кон следните совети.
– редовно јадете топли оброци подготвени од свежи плодови
– јадете исклучиво сезонско овошје и зеленчук
– јадете домашно подготвени компоти
– внимавајте на староста и на квалитетот на храната
– зачини што најмногу треба да ги користите се ѓумбирот, коријандерот, кимот и ловоровиот лист
– секогаш на јадењата додавајте им рендана кора од лимон
– јадете што е можно помалку леб
– немојте да пиете ладни напитоци
– избегнувајте шеќер и јужно овошје