Разговорите меѓу делегациите на САД и Иран продолжија во ноќта, но тие „напредуваат во вистинската насока“ по две рунди, објави АФП, повикувајќи се на неименуван пакистански функционер, чиј премиер Шехбаз Шариф претходно одржа одделни состаноци со преговарачите од двете страни.

„Можам да кажам дека дискусиите се движат позитивно и дека целокупната атмосфера е срдечна“, рече функционерот, зборувајќи под услов да остане анонимен, според извештајот на „Франс 24“ од пакистанската престолнина.

Друг пакистански функционер и иранската државна телевизија рекоа дека е веројатна трета рунда разговори, пренесе Би-би-си.

Во меѓувреме, американскиот претседател Доналд Трамп вечерва во европско време изјави дека „не му прави разлика“ дали ќе се постигне договор, како и дека „што и да се случи, ние (САД) победуваме“.

Иранската делегација, која се состои од повеќе од 70 членови, ја предводи претседателот на парламентот Мохамед Багер Галибаф, заедно со министерот за надворешни работи на земјата, Абас Арагчи.

Тие претходно одлучија да започнат разговори со своите американски колеги по состанокот со пакистанскиот премиер Шехбаз Шариф, според извештаите на иранските медиуми, цитирани од АФП.

„Премиерот изрази надеж дека овие разговори ќе послужат како чекор кон траен мир во регионот“, соопшти кабинетот на пакистанскиот премиер.

Иран и САД лице в лице во Исламабад: Кој седнува на преговарачката маса?