Матурската вечер е еден од најважните моменти за секоја девојка, а шминката е важен дел од целиот изглед.

Мејкап-артистката Викторија Велјаноска, која е сопственичка на студиото „Викторија бјути студио“, вели дека годинава доминира природниот и блескав изглед, а најважно е матурантките да останат верни на себе и на својата природна убавина.

„Најчеста грешка е кога младите девојки се обидуваат преку шминката да изгледаат повозрасно отколку што се. Претерано тешка пудра, јаки контури, мат ефект или драматични трепки често знаат да го прикријат младешкиот изглед, а не е тоа намерата. Матурската шминка треба да ја истакне природната убавина, а не да го промени личниот опис“, вели Викторија.

Таа открива дека оваа сезона најбарани се „soft glam“ (во превод: суптилен гламур) изгледот, блескавата и чиста кожа, нежните земјени тонови и сјајните усни.

– Многу актуелни се т.н. сјајни усни, нежни трепки и шминка која изгледа убаво и во живо и на фотографии. Девојките сè повеќе сакаат свеж и природен изглед – објаснува таа.

Според неа, усогласеноста на шминката со фризурата и фустанот е многу важна, но најважно е девојката да се чувствува удобно и самоуверено.

– Секогаш обрнувам внимание на фризурата, фустанот и накитот, но најважниот детал е карактерот и комфорот на клиентката. Само така се добива хармоничен изглед и задоволна клиентка – додава мејкап-артистката.

Неколку дена пред матурата, советува да не се експериментира со нови козметички производи и да се посвети внимание на негата на кожата.

– Добриот сон, хидратацијата и правилната подготовка на кожата се клучни за беспрекорна и долготрајна шминка – вели Викторија.

Таа забележува дека голем дел од девојките доаѓаат со фотографии од Инстаграм и ТикТок, но потенцира дека трендовите не му прилегаат на секое лице.

– Секогаш се обидувам да им објаснам дека вистинската цел е шминката да ги истакне нивните природни црти, а не да доведе до промена на личниот опис. Најважно е да изгледаат свежо, модерно и самоуверено – и во живо и пред камера – вели таа.

За крај, Викторија порачува дека самодовербата е најдобриот „додаток“ за секоја матурантка.

– Трендовите се менуваат, но природната убавина, негуваниот изглед и самодовербата оставаат најсилен впечаток. Матурата е вечер за славење на младоста и убавината и најважно е секоја девојка да блесне на свој начин – порачува таа.

Креативно студио со „Викторија бјути студио“: Како дете често знаев да се заиграм со шминките на мајка ми