Ксенија Котев е дизајнерка на накит, која своите додипломски студии ги завршува на академијата за моден дизајн во Фиренца на Академија Италијана, по што продолжува со постдипломски студии на Домус академијата во Милано, отсек дизајн на модни додатоци. Нејзиниот бренд „Котев Ксенија“ датира од 2015 година.

Филигранот како стара и традиционална техника го изучува од локалните занаетчии во Старата скопска чаршија, каде што парчето накит се создава меѓу две топли дланки и еден ум.

Името на Вашата најнова колекција на накит – „Нијанси на хармонијата“ (Shades of harmony) е една од Вашите, условно кажано, најхармонични колекции. Која е инспирацијата?

– Водата. Со танцувачките рефлексии на светлина и боја, водата стимулира интуиција, чувствителност, имагинација и слобода на движење.

Таа е симбол на бесконечниот проток што се движи низ блокадите на душата и го ослободува внатрешниот мир. Со сета своја моќ се смета за прочистувач на душата. Персонификација на заштита и ранливост, промена и постојаност. Нејзиниот постојан движечки тек има способност да ги смири и да ги маѓепса сите сетила и да ве поврзе со внатрешното јас.

Кое парче накит од колекцијата беше посебен предизвик при создавањето?

– Колекцијата брои седумнаесет сребрени 925 парчиња накит. Посебен предизвик беа сите шест дизајни во кои се имплементирани кристали бидејќи треба да се преточи во тие дизајни фокусирана и сензитивна емоција што ќе носи позитивни промени кај клиентот. Исто како водата што има тенденција за трансформирање на негативна во позитивна енергија.

Среброто секогаш е Вашиот прв избор. Дали некогаш би го замениле?

– Среброто е најдобар проводник на топлина, во превод за мене значи дека најтопло можам да ги изразам своите емоции преку дизајните. Играта со среброто нуди ексклузивност, елеганција и автентичност во дизајните. Лојална сум на среброто, но би сакала во иднина да вметнам и други метали.

Колекцијата ја промовиравте во КСП Центар – Јадро како дел од отворена изложбата на македонска мода и дизајн „Слоускејпс“ (Slowscapes). Колку на Скопје му недостасуваат настани од овој тип?

– Ѝ не само на нашиот главен град, туку вакви настани недостасуваат и во другите градови низ Македонија. Нешто што недостига се концепт продавници каде што ќе бидат изложени колекции на нашите дизајнери што го поддржуваат концептот на одржлива и бавна мода, а притоа ќе бидат групирани по сличен сензибилитет на дизајнот.

Без кое парче накит не би можеле да излезете од дома?

– Дефинитивно, без прстен. Мојата последна колекција брои седумнаесет парчиња накит, од кои три се обетки, две се ланчиња, една алка, еден брош и неслучајно, десет прстени.

Под Ваш дизајн создавате и накит креиран според желба и сензибилитет на клиентот, без да ја напуштат препознатливоста на брендот. Кои би ги издвоиле?

– Секое парче што е изработено по нарачка бара конекција со клиентот на посебно духовно и интелектуално ниво, „исполирано“ со мојот дизајнерски печат.

Парче што би го издвоила како посебен предизвик беше изработката на машки манжетни.