Рускиот претседател Владимир Путин го покани украинскиот лидер Володимир Зеленски да дојде во Москва на мировни преговори, со порака дека Русија е подготвена да ја обезбеди безбедноста на состанокот.

„Украинската страна ја сака оваа средба и ја нуди оваа средба. Јас реков: „Подготвен сум, ве молам дојдете, сигурно ќе обезбедиме услови за работа и безбедност“, рече Путин на пленарната сесија на Источниот економски форум во Владивосток, пренесува РИА Новости.

Тој истакна дека Русија е подготвена да им обезбеди „стопроцентни“ безбедносни гаранции на Зеленски и претставниците на Киев доколку одлучат да дојдат во руската престолнина.

Путин нагласи дека одржувањето состанок во неутрална, трета земја е „прекумерно барање“.

„Следниот пат, ако некој навистина сака да се сретне со нас, ние сме подготвени. Најдоброто место за тоа е главниот град на Руската Федерација, херојскиот град Москва“, рече Путин.

Рускиот претседател изјави дека е подготвен за контакти со украинската страна, но истакна дека „не ја гледа целта“ во тоа.