Рускиот претседател Владимир Путин се определи за работа преку видео врска поради ширењето на новиот коронавирус, им рече денеска на новинарите портпаролот на Кремљ, Дмитриј Песков.

Тој го објави ова само ден откако главниот лекар на водечката московска болница каде се лечат пациенти од Ковид – 19, кој го прими Путин во својата установа, минатата недела, рече дека е заразен од коронавирус.

„Претседателот повеќе сака овие денови се да работи преку видео врска“, рече Песков пред состанокот со Путин и руската влада кој невообичаено ќе биде одржан преку видео линк. „Ние ги преземаме сите мерки за претпазливост“, додаде Песков.

Доктор Денис Проценко, главниот лекар на болницата Комунарка во предградието на Москва која стана главна установа за заболени од Ковид-19, вчера објави дека е заразен, но нема загрижувачки симптоми.

Путин (67) на 24 март ја посети болницата, а тој и лекарот тогаш се ракуваа, заедно одеа со лифт и разговараа без заштитни маски.

„Сите кои беа со претседателот во Куминарка секојдневно се тестираат на коронавирус“, рече денеска Песков, кој веќе синоќа даде уверување дека анализите на рускиот претседател се „нормални“.

Запрашан дали Путин и натаму се ракува со своите соговорници кога ќе ги сретне, Песков рече дека секако сега сите држат социјална дистанца.

Во Русија од понеделникот половина од жителите се во изолација за да се спречи ширењето на епидемијата од која досега во земјата се регистрирани 2.777 заразаени и 24 мртви.