Путин: Проблемот со климатските промени е заеднички интерес на Русија и САД
Претседателот на Русија, Владимир Путин на средбата со американскиот претставник за климата Џон Кери, изјави дека Москва и Вашингтон делат заеднички интерес за климатските промени.
– Проблемот со климата е еден од секторите каде Русија и САД имаат заеднички интерес и сличен пристап, посочи Путин.
Тој додаде дека придава „големо значење” на остварување на целите од Парискиот договор за климата, како и оти поддржува „деполитизиран дијалог” на таа тема.
Русија, една од најголемите светски производители на нафта и гас, изминатите години во неколку наврати ветуваше дека сериозно ќе ги сфати климатските промени. Путин, за време на својот годишен говор во април, истакна дека Русија мора да се прилагоди на климатските промени и нареди создавање индустрија што ќе го рециклира јаглеродот испуштен во атмосферата.
Климатските промени се едни од ретките области во кои САД и Европска Унија, дури и во услови на постојани тензии со Москва, изразија подготвеност да соработуваат со Русија.