Путин да не доаѓа на самитот на БРИКС зашто може да го уапсиме, порачуваат властите во Јужна Африка
Јужноафриканските власти преку дипломатски канали испратиле барање до Москва рускиот претседател Владимир Путин да не доаѓа на самитот на БРИКС кој треба да се одржи во август во Гаутенг, пишува рускиот независен весник „Moscow Times“.
Од Кремљ досега не потврдиле дека Путин би можел да патува за Јужна Африка на самитот, откако во февруари Хашкиот суд издаде налог за апсење на рускиот претседател. Јужноафриканската република го покани Путин на самитот пред еден месец, и покрај тоа што земјата го има ратификувано документот со кој се регулира работата на Меѓународниот кривичен суд во Хаг. Тоа би било првото патување во странство надвор од поранешните советски републики на Путин од почетокот на руската инвазијата врз Украина. Но, според информациите, властите на Јужна Африка сега сепак го замолуваат рускиот претседател да не доаѓа.
Според извори од јужноафриканската влада на кои се повикува локалниот весник „Сандеј Тајмс“, властите во оваа земја не гледаат друга опција освен да го уапсат Путин по налог од Меѓународниот кривичен суд во Хаг. Овој заклучок, според весникот, го донела специјалната комисија на владата, која ја формирал јужноафриканскиот претседател Сирил Рамафоса, кој инаку важи за сојузник на Путин.
Јужна Африка, како и повеќе од 120 други земји во светот, го има ратификувано Римскиот статут, главниот документ со кој се регулира работата на Хашкиот суд. Како последица на тоа, земјата е обврзана да ги почитува неговите одлуки, вклучително и налозите за апсење на осомничени за воени злосторства.
„Немаме опција да не го уапсиме Путин“, изјавил неименуван владин претставник за „Сандеј тајмс“. „Ако тој [претседателот на Руската Федерација] дојде овде, ќе бидеме принудени да го приведеме“.
Јужна Африка, според изворите на весникот, е во разговори со Кремљ, а Путин наводно продолжува да се двоуми за можното патување на самитот.
„Претседателот на Русија ќе учествува на настанот, но форматот на ова учество допрва треба да се разјасни“, изјави портпаролот на Кремљ, Дмитриј Песков, на крајот на април. „Се разбира, ќе учествуваме во работата на самитот што ќе се одржи во Јужна Африка. Се разбира, на ова ќе му претходат нашите билатерални контакти со Јужноафриканците, ќе ја разјасниме нивната позиција“, додаде тој.
Од правна гледна точка, јужноафриканските власти навистина немаат избор: ако Путин не биде уапсен, тоа ќе биде кршење не само на меѓународното право, туку и на законите на самата земја, вели Пријал Синг, виш истражувач на Јужноафриканскиот институт за безбедносни студии.
Дури и теоретското сценарио за напуштање на јурисдикцијата на МКС пред евентуалната посета на Путин не е изводливо: едноставно нема да има доволно време за тоа, велат правниците со кои разговараше „Фајненшл тајмс“. „Ако Путин навистина се појави, тоа ќе биде „огромна негатива“ и владата очигледно е свесна за тоа“, вели Синг.
