Рускиот претседател, Владимир Путин, потпиша нов декрет со кој се бара од платеничките групи, вклучително и Вагнер, да се заколнат на верност на руската држава.

Претседателската извршна наредба која стапи на сила вчера ги опфаќа платениците, доброволците и сите кои се вклучени во „специјална воена операција“.

Воведувањето задолжителна заклетва за борците на Вагнер и другите паравоени сили е потег кој има цел таквите групи да се стават под построга државна контрола, пишува Ројтерс.

Декретот, објавен на сајтот на Кремљ, пропишува дека секој кој работи во име на војската или ја поддржува „специјалната воена операција“ во Украина е обврзан да положи официјална заклетва на верност на Русија.

Се наведува дека тоа е чекор кон „создавање духовни и морални основи за одбрана на Русија“.

Понатаму се наведува дека оние кои ќе ја положат заклетвата ветуваат дека стриктно ќе ги следат наредбите на командантите и повисоките лидери.