Првата виолина на легендарниот научник Алберт Ајнштајн, кој бил принуден да ја скрие од нацистите, ќе се најде на аукција во Велика Британија по почетна цена од 300.000 фунти (околу 345.800 евра), пренесува „Дејли мејл“.

Познатиот физичар Ајнштајн ја набавил виолината во средината на 1890-тите години, пред да го напушти Минхен и да замине во Швајцарија на студии. На инструментот, на кој самиот вгравирал „Лина“, свирел и во своите тинејџерски години и во зрелоста – токму во периодот кога ја развивал својата славна теорија на релативноста.

Виолината, која ја носи оригиналната етикета на минхенскиот производител, ги содржи сите првобитни делови – жици, опашна врвка и завртките за фино подесување.

Покрај виолината, на аукција ќе се најдат и Ајнштајновото велосипедско седиште, проценето на околу 57.600 евра, како и книга за филозофијата на Декарт и Спиноза, потпишана двапати од научникот, која може да достигне цена од најмалку 3.500 евра.

Овие предмети останале во сопственост на семејството Ајнштајн повеќе од седум децении, пред да бидат пренесени кај аукциската куќа „Доминик винтер“ во Сајренстер, Глостершир.

Ајнштајн, кој започнал да свири виолина на само пет години, останал страсен музичар цел живот, настапувајќи и јавно. Своевремено дури и изјавил дека би избрал кариера како музичар, доколку не станел физичар.