МЗТ Скопје е победник на дербито од шестото коло во Првата кошаркарска лига, откако во Битола го совлада Пелистер со 72-67 и му го нанесе првиот пораз оваа сезона.

Дербито започна изедначено, со чести промени во водството. Првата четвртина им припадна на „штрковите“ кои водеа со 15-13, но Пелистер во вториот период успеа да малку преземе контрола и на полувреме замина со предност од 32-29.

Во третиот дел, актуелниот шампион не дозволи домаќините да се одлепат, МЗТ се врати во игра и со само два поени предност влезе во последната четвртина, кога се решаваше победникот.

Токму тогаш, битолчани како да останаа без енергија, а МЗТ одигра најдобри минути кога беше најпотребно. Средината на последниот период го најави триумфот на гостите, кои првпат поведоа со двоцифрена разлика (61-51).

Пелистер се обиде да се врати со тројката на Стајиќ, со која намали на 60-65 три минути пред крајот, но гостите не дозволија изненадување и ја задржаа предноста до самиот крај. Мекејден од редовите на МЗТ беше најефикасен со 20 поеи, а мора да се истакне и настапот на Гил кој дојде до дабл-дабл од 17 поени и 11 скокови. Кај Пелистер Стајиќ уфрли 17, а Малешевиќ 16.

За МЗТ ова е петта победа во шест натпревари од стартот на сезоната – единствениот пораз им е административен против Анѓели, иако на теренот победија. Пелистер, пак, по пет стартни победи, го запиша првиот неуспех.

Преземено од: Спорт.ком.мк