По дваесет и петти пат по ред, пратениците на косовското собрание денеска не успеаја да го конституираат деветтиот парламентарен состав, што е резултат на изборите во февруари.

Пратениците по седумнаесетти пат по ред одбија да формираат комисија која ќе го надгледува тајното гласање за новиот шеф на законодавното тело.

Прашањето за тајно гласање – кое беше предложено на 1 мај од страна на претседателот на седницата, Авни Дехари, откако кандидатката на движењето Самоопределување (ЛВВ) за претседател на Собранието, Аљбуљена Хаџиу, не успеа на неколку гласања да добие 61 глас потребен за да биде потврдена на функцијата – е испратено до Уставниот суд на Косово од партиите што беа во опозиција во претходниот законодавен состав.

Тие велат дека начинот на кој ЛВВ се обидува да го изгласа претседателот на парламентот преку тајно гласање е неуставен и побараа од Уставниот суд да преземе „привремена мерка за забрана на одржување седници, сè додека не го реши ова прашање како приоритет и не донесе одлука“.

Демократската партија на Косово (ПДК), Демократската лига на Косово (ЛДК), Алијансата за иднината на Косово (ААК) и Српската листа повторно одбија, за време на конститутивната седница на 2 јуни, да предложат претставник кој ќе обезбеди непречено спроведување на тајното гласање.

Конститутивната седница ќе продолжи во среда, на 4 јуни.

Досега, пратениците усвоија само две точки од дневниот ред на конститутивната седница: извештајот на Привремената комисија за верификација на мандатите и заклетвата на пратениците.

Но, процесот е заглавен во третата точка: изборот на претседател на парламентот.

Хаџиу од ЛВВ се смета за фигура што предизвикува поделби од страна на две парламентарни партии: ПДК и ААК.

Овие два субјекта побараа од ЛВВ да објави друго име за претседател на парламентот. ЛДК, во меѓувреме, соопшти дека нема гласови за ниту еден од номинираните на ЛВВ за позицијата претседател на парламентот.

Номинацијата за претседател на парламентот е ексклузивно право на победникот на изборите, ЛВВ, која инсистира дека Хаџиу заслужува да биде избрана и, иако побара политички договор со други партии, ја отфрли можноста за предлагање на друг кандидат освен неа.

Пратениците мора да го изберат претседателот и петте потпретседатели за конечно да го конституираат новото Собрание.

Дури по конституирањето на Собранието може да се формира новата Влада.