Промовирана е сликовницата „Танцот на шарените шамичиња“ од Александар Прокопиев со илустрации на Сања Симоска
Многубројна публика од сите генерации, книжевници и новинари, на 16 јануари присуствуваа на промоцијата на новата сликовница „Танцот на шарените шамичиња“ од познатиот писател и книжевник Александар Прокопиев во амбиентот на книжарницата „Литература.мк суперстор“ во „Скопје сити мол“.
Книгата, која е во издание на „Либи“, дел од „Арс Ламина – публикации“, е со илустрации на Сања Симоска. Сликовницата е дел од новата едиција „Љубов на прв збор“, со која се реафирмираат постари, класични и малку подзаборавени раскази, песни и други дела на познати македонски писатели за деца.
Уредничката на сликовницата Оливера Ќорвезироска истакна дека воскреснувањето на подзаборавените дела од националните книжевности секогаш е значајно, а во мигов е тренд и во книжевноста во регионот пошироко. Тоа е одличен пат за надоврзување на најмладите генерации на сопствената традиција, на генерациите на своите родители, баби и дедовци. Емоционален, книжевен, воспитен континуитет.
Ракописот „Танцот на шарените шамичиња“ првично е објавен како дел од книгата за возрасни на Прокопиев – „Човечулец: бајки од левиот џеб“, објавена во 2011 година. Тоа е и еден од трите раскази на Прокопиев што се најдоа во антологија на македонскиот расказ за деца, објавена во 2014 година во Хрватска.
– Интересното за оваа сликовница е што, пред сè, е ексцерпт од книга за возрасни, второ – затоа што тоа воопшто не се забележува, не го оштетува текстот, туку, напротив, се потпира на својата висока самостојност и беспрекорно функционира како сама раскажувачка единка од еден во друг книжевен формат – од книжевноста за возрасни во книжевноста за деца. Оваа постапка, што делумно може да се нарече и како убав експеримент за проширување, обединување на книжевноста, за бришење на границите меѓу книжевноста за деца и книжевноста за возрасни, еве ни го овозможи „Танцот на шарените шамичиња“ како одличен текст податлив за илустрирање, како одличен текст за сликовница. Самостоен, прецизен, топол, суптилно воспитен и поучен, на еден модерен начин, без попување и старинска дидактика, без „триење сол“ на главата на децата, како што се вели народски – рече Ќорвезироска.
Промоторката Ќорвезироска откри дека писателот и илустраторката првпат физички се сретнале на промоцијата. Претходно комуницирале само преку интернет (или со посредство на редакцијата на „Арс Ламина“). Но, и покрај тоа, нивните нарации се компактни, како да работеле многу години заедно.
– „Танцот на шарените шамичиња“ е еден сосема неочекуван проект за мене. Од издавачката куќа го пронајдоа овој мој текст и ми ја претставија идејата да се реобјави во овој многу шармантен формат. Така, оваа мала приказна за деца доби крилја, како што и главниот лик – шамичето добива можност да „полета“ кон остварување на своите соништа – изјави писателот Александар Прокопиев.
Младата илустраторка Сања Симоска е академски графичар. „Танцот на шарените шамичиња“ е нејзина втора сликовница, а има објавувано илустрации и во списанија.
(Текстот е објавен во „Културен печат“ број 163, во печатеното издание на весникот „Слободен печат“ на 21-22 јануари 2023)