Филмскиот проект „Пролетно чистење“ на „Кино око“ ќе се развива на Канскиот фестивал
Филмскиот проект „Пролетно чистење“ на режисерката Марија Апчевска-Петровска во продукција на „Кино Око“, а по сценарио на Марија Апчевска-Петровска и Ереник Бекири, е еден од 10-те проекти одбрани на 16-та едиција на престижната програма „La Fabrique Cinéma“ на Францускиот институт за препознавање и промовирање на филмаџии и продуценти од целиот свет. Ова е прв македонски проект одбран во оваа програма.
Програмата „La Fabrique Cinéma“ ќе се одвива во рамките на Канскиот филмски фестивал од 14 до 25 мај, каде продуцентот Роберт Насков и режисерката Марија Апчевска-Петровска ќе имаат можност да го претстават проектот „Пролетно чистење“ пред најдобрите агенти за продажба и дистрибутери, како и пред програмери и селектори на најголемите филмски фестивали.
„La Fabrique Cinéma“ претставува програма за идентификување и промовирање на филмаџии и продуценти од земјите во развој, која нуди поддршка по „мерка“ за први и втори филмски проекти, а во тесна соработка со Канскиот фестивал, Филмскиот маркет и бројни професионални партнери.
„La Fabrique Cinéma“ е алатка која поддржува меѓународна копродукција со Франција, покрај фондот „Aide aux Cinémas du monde“, фонд со кој заеднички управуваат Францускиот национален филмски центар (CNC) и Францускиот институт.
Од 2009 година, програмата поддржала 154 проекти од земјите во развој и помогнала на 282 учесници, од кои 43 проценти се жени од 65 различни националности.