По седниците на Групата за процена и Управувачкиот комитет, што се одржаа во Центарот за управување со кризи, беше донесена одлука припадниците на МВР и Армијата да бидат ангажирани како поддршка на затворската полиција на КПД Идризово.

Од ЦУК информираат дека оваа одлука е донесена откако била согледана фактичката состојба во оваа установа од безбедносен аспект.

-Еден од главните проблеми со кои се соочува оваа казнено поправна установа е недостатокот на кадар во затворот. Бројот на вработени лица во затворската полиција е недоволен за да ги задоволи секојдневните потреби и активности во најголемата казнено поправна установа во државата. Кон ова решение се пристапува поради важноста на потребата од нови вработувања во затворот при што приоритет ќе се дава на пополнување на испразнети места во затворската полиција, велат од ЦУК.

Тие информираат дека Владата ќе го задолжи ресорното Министерство за правда заедно со раководителите на казнено поправните установи во земјата, да изнајдат соодветнен начин за подобрување на условите на вработените во затворите, како и вработување на нов кадар одговорен за безбедност и ресоцијализаиција на затворениците.

-Владата и институциите ќе продолжат да ги вложуваат сите напори, казнено поправните домови во државата да ги достигнат меѓународните и националните стандарди на човековите права, со што би им се овозможил соодветен третман на осудените лица, додаваат од Центарот за управување со кризи.