Британскиот принц Филип, сопруг на кралицата Елизабета Втора, беше преместен во друга болница во Лондон за понатамошно лекување на инфекцијата и набљудување на постоечките проблеми со срцето, објавија од Бакингемската палата.

Принцот Филип помина 14 дена во болницата „Кинг Едвард VII“, а денеска ќе биде пренесен во болницата „Свети Вартоломеј“ во Лондон.

Имено, лекарите ќе продолжат да го лекуваат од инфекцијата и дополнително ќе ја набљудуваат постоечката здравствена состојба на неговото срце, пренесува „Си-Ен-Ен“.

Се очекува принцот Филип да остане во болница барем до крајот на неделата, се вели во соопштението од палатата. Изминатиов период од палатата потврдија дека не станува збор за коронавирус, но не објаснија за каква инфекција се работи.

Принцот Филип кој во јуни треба да го прослави својот 100-ти роденден, во 2017 година се повлече од сите кралски должности, а со кралицата Елизабета се појавува во јавност само на посебни, важни државни и семејни прилики. Кралицата Елизабета и принцот Филип имаат четири деца, а во текот на својот живот имаа неколку илјади посети низ целиот свет и заедно ги надминаа најголемите скандали во британската кралска историја.

Принцот Филип е „многу подобар“, но останува во болница: Го лекуваат од инфекција