Во Велешкиот театар „Јордан Х. К. Џинот“ на 13 јуни премиерно ќе биде изведен перформансот „Елегија во пет здива“, танц-театар базиран по мотиви од избрана поезија од поетите Радован Павловски, Петре М. Андреевски, Михаил Ренџов, Ацо Шопов и Никола Маџиров.

Трансформацијата на поезијата како уметничка форма која го користи јазикот за постигнување естетски квалитети и продлабочување на нејзината семантичка содржина, преточени во танцов перформанс, е главна задача на режисерот и кореограф Филип Петковски.

Во претставата се прикажани пет слики (пет здива), односно пет перформанси кои имаат за цел да создадат универзално разбирлив сценски јазик, доловен преку мултидисциплинарен пристап на подготовка и изведба преку комбинација на повеќе медиуми на сценско изразување, како танц, нарација и физички театар.

– Актерите/танчерите во претставата ги користат сопствените тела како субјекти, како медиум за отелотворување на дадена емоционална состојба. За подготовките на претставата, актерите/танчерите беа изложени на нов процес на работа, односно, работеа по техниката „View points“, адаптирана од режисерите Ен Богарт и Тина Ландау, која служи како медиум за освестување на сетилата за гестикулација, движење и креативно изразување во просторот – објаснува Петковски.

Претставата е во режија и кореографија на Филип Петковски, а играат Васил Зафирчев, Симона Димковска, Наталија Теодосиева и Адријана Данчевска.

Костимографијата е на Антонија Гугинска Јорданоска, Маја Ѓуреска и Гордана Божиновска. Дизајнер на светло е Милчо Александров. Селектирана е музика од Даха Браха, Пјотр Илич Чајковски, Лудвиг ван Бетовен, Борис Харфман, Хрвоје Црниќ, Кристоф Пендерецки, Дуке Бојаџиев, „Синтезис“. Камерата во визуелните сегменти е на Борјан Стојков, а фотографијата и графичкиот дизајн се на Ивана Мојсовска.

Премиерната изведба е закажана за 13 јуни, со почеток во 20 часот, на големата сцена на Театар „Џинот“ – Велес. Проектот е финансиран од Министерството за култура на С Македонија.