Сопругата на пратеникот од редовите на СДСМ Костадин Ацевски, Марија Ацевска, повикала полиција по расправија со него во домот скопската населба Ѓорче Петров, пренесува Канал 5.

До расправијата, како што стои во официјалната информација од МВР, дошло бидејќи Ацевски сакал да ги земе нивните две малолетни деца.

,,На 27.11.2019 год во 21,30 часот во СВР Скопје се јавила М. А. (37) од Скопје и пријавила дека сопругот К.А. (40) од Скопје се расправал со неа и сакал да ги земе со него нивните деца“, информираат од МВР.

Полициски службеници излегле на местото на пријавата за расчистување на случајот.

Во јавноста се појавија информации дека при семејната драма, Ацевски наводно бил „агресивен и насилнички се однесувал кон сопругата“.

Сопругата на Ацевски од друга страна вели дека не била нападната ниту физички, ниту вербално и дека тој со неа се однесувал внимателно, пренесува Сител.

Ацевски на денешна пресконференција на СДСМ, ги демантираше овие тврдења.

– Објавените информации денеска за наводно семејно насилство во мојот дом се кулминација на серијата лажни вести и невистини што одредени медиуми блиски до ВМРО-ДПМНЕ во континуитет ги пласираат за мене и моето семејство. Најостро и целосно ги демантирам и ги отфрлам и осудувам пласираните невистини за наводно семејно насилство во мојот дом или предизвикано од мене. Ова го квалификувам како бесрамна лага, манипулација и злоупотреба на малолетни деца, семејни односи и недоразбирања во дневно политички цели. Најодговорно тврдам дека се нема случено никакво физичко, психичко, вербално ниту какво било насилство од моја страна врз мојата сопруга, изјави на денешната прес конференција пратеникот Костадин Ацевски.