Вознемирени жители на скопското село Бучинци вечерва алармираат дека пожарот, кој веќе неколку дена беснее на ридовите над селото, носен од силниот ветер, се доближува до нивните куќи. Тие ги повикуваат надлежните да реагираат, а соселаните да излезат и самите да го гаснат пожарот.

„Огнот се спушта накај куќите, ниту пожарникари има, не било пристапно местото. Се шири и накај Мршевци, искачајте луѓе“, вели една жителка на Бучинци.

Од Противпожарната бригада на Град Скопје велат дека тој пожар е активен веќе три дена и дека ја следат состојбата, а тврдењата на жителите дека огнот може да ги загрози куќите во селото ги нарекоа дезинформации.

И жителите на Мршевци вечерва објавија фотографии на кои се гледа како пожарот се доближува до селото.

Според некои информации од локалното население, ветерот го шири пожарот кон соседното село Ајватовци.