Поранешниот фудбалер на младинската школа на Челси, Ламиш Мусонда, на 33-годишна предизвика реакции во спортската јавност со отворена и длабоко емотивна исповед, откривајќи дека се соочува со сериозна и животозагрозувачка здравствена состојба.

Белгиецот пристигна на „Стемфорд Бриџ“ во 2012 година заедно со своите браќа Тика и Чарли, а во редовите на лондонскиот гигант помина две години како дел од младинските категории. По заминувањето од Челси, Мусонда се врати во татковината каде настапуваше за Мехелен, а подоцна ја продолжи кариерата во Шпанија, играјќи за Лагостера и Паламос. Дел од својата фудбалска приказна ја мина и во Африка, каде го носеше дресот на конгоанскиот Мозембе.

Во репрезентативната кариера запиша девет настапи за селекцијата на Белгија до 21 година, а активното играње фудбал го заврши во 2020 година.

Преку објава на социјалните мрежи, Мусонда со болка призна дека не му останува многу време, потенцирајќи колку исцрпувачки и тешки биле изминатите години од неговиот живот во кои се соочува со тешка болест.

„Како што сфаќам дека ми останале само неколку дена, така сфаќам и дека имав многу луѓе покрај себе и секогаш ќе ги ценам спомените. Животот е тежок, но погледот е прекрасен. Низ годините ќе се соочите со подеми и падови и никој не може вистински да ја разбере болката низ која поминувате.

Последните две години ми беа особено тешки и исполнети со предизвици. Со голема тага објавувам дека се борам да го повратам здравјето. Тоа е причината зошто бев отсутен од социјалните мрежи. Морам да се соочам со факти,  моето здравје е критично и сега се борам за преживување. Вашата помош и молитви ќе ми значат многу во овој момент. Моето семејство и јас се бориме и нема да се откажам до последниот здив“

Имав среќа што имав убав живот и сè уште имам толку многу да понудам. Но, има толку многу прекрасни луѓе на кои би сакал лично да им се заблагодарам, а помислата дека можеби нема да добијам шанса за тоа длабоко ме растажува“, објави Мусонда.