Потпретседателката на Европскиот парламент, Ева Каили од Грција и поранешниот европратеник, како и Италијанецот Пјер-Антонио Панцери, се приведени по истрагата за корупција во Белгија.

Европскиот парламент е во фокусот на опсежната истрага во Белгија за „корупција и перење пари“. Во рамки на истрагата уапсена е потпретседателката на Европскиот парламент, Ева Каили. Грчката политичарка веќе беше исклучена од нејзината партија ПАСОК во четвртокот вечер.

Пратеничкиот клуб на социјалдемократите во Европскиот парламент, исто така, донесе одлука за нејзино исклучување. Според сознанијата на весниците „Ле Соир“ и „Кнак“ осомничените примиле значителни суми пари и подароци како поткуп.

Каили, една од потпретседателките на парламентот, која е сега уапсена, на 21 ноември во Европскиот парламент одржа говор за актуелното Светско првенство во Катар. Овој спортски настан го опиша како доказ дека „спортската дипломатија може да донесе историска промена во земјата чии реформи го инспирираа арапскиот свет“.

Од службата за соработка со медиумите во Европскиот парламент не сакаа да ја коментираат рацијата поради истрагата која е во тек. Одговорија само дека оваа служба во целост соработува со белгиската полиција.