Во поплавите во Танзанија загинаа 58 луѓе во последните две недели, соопшти владата, додека обилните дождови продолжуваат во оваа источноафриканска земја.

Според владата, најтешко е погоден крајбрежниот регион, со 126.831 погодени луѓе, пренесува АП.

Портпаролот на владата Мобаре Матињи во неделата рече дека на погодените им биле дистрибуирани основни материјали, вклучително и храна.

Танзанија планира да изгради 14 брани за да спречи поплави во иднина, додаде тој.

Во Источна Африка има обилни врнежи од дожд, а во пријавените поплави во соседна Кенија досега загинаа најмалку 13 луѓе.

Оштетена е и инфраструктурата, а оние кои живеат во подрачјата подложни на поплави се повикуваат да се евакуираат.

Врнежите се очекува да го достигнат својот врв кон крајот на овој месец.