Полските борбени авиони МиГ-29 утрово повторно пресретнаа руски извидувачки авион Ил-20 над Балтичкото Море, соопшти Оперативната команда на полските вооружени сили. Иако немало нарушување на полскиот воздушен простор, ова е трет ваков инцидент оваа недела, објави PolskieRadio24.

Полските авиони МиГ-29 полетаа пред 9 часот утрово за да го идентификуваат рускиот авион. Оперативната команда соопшти дека рускиот авион повторно летал без вклучен транспондер и без претходно доставен план за лет.

„Рускиот авион повторно се движеше без поднесен план за лет и со исклучен транспондер, што претставува потенцијална закана за безбедноста во сообраќајот во регионот“, се вели во соопштението.

Полските пилоти, во согласност со процедурите на НАТО, го пресретнаа, идентификуваа и придружуваа странскиот авион. Според полската команда, активноста на руската авијација во балтичкиот регион се зголемува. Како резултат на тоа, полската војска е во целосна готовност и подготвена да реагира.

„Полската армија останува во целосна борбена готовност и ефикасно реагира на сите провокативни дејствија од страна на Руската Федерација, дејствувајќи во тесна соработка со сојузниците од НАТО“, се заклучува во соопштението.