Српската полиција уапси едно лице за кое постои сомневање дека фрлило бомба врз куќата на пејачот Здравко Чолиќ, додека по уште едно лице се трага, соопшти српското Министерство за внатрешни работи, а пренесе РТС.

С. М. (1993) се товари за кривично дело недозволено производство, држење, носење и промет на оружје и експлозивни материи, како и за предизвикување општа опасност во соизвршителство. По налог на Вишото јавно обвинителство, му е одреден притвор во траење од 48 часа.

МВР, исто така, наведува дека постои сомневање оти С. М. и уште едно лице по кое се трага, на 3 февруари околу 4.52 часот дошле до семејната куќа на оштетениот на Дедиње, каде што активирале и фрлиле рачна бомба во дворот.

Бомбата била фрлена во дворот на куќата на пејачот. Нема повредени лица, но причинета е материјална штета.

По фрлањето на експлозивната направа врз неговата куќа во Белград, Здравко Чолиќ изјави дека сите членови на неговото семејство се добро и дека тој се наоѓа во Загреб, каде што го довршува новиот албум.