Последната поетска збирка на еден од најголемите современи шпански и европски поети на дваесеттиот век, Џоан Маргарит, со наслов „Чудесна зима“ е објавена во издание на „Артконект“.

Во збирката авторот прави заокружување на своето творештво, навраќајќи се на теми и мотиви кои се доминантни во неговата поезија уште од неговите први песни објавени пред четириесетина години.

– Најголемата грешка што може да ја стори еден поет е да мисли дека може да напише песна само поради тоа што ја нашол само убавината или само вистината, мислејќи дека зад едната неизбежно може да ја најде другата. Инспирацијата е токму тој редок и тежок чин кој се состои од локализирање место каде што ќе биде доволно веројатно дека може заедно и неразделно да постојат и вистината и убавината. Вистината и убавината заедно. Но тие не се секогаш заедно. А кога тоа ќе се случи, тогаш тоа е силно поврзано со љубовта – напишал Џоан Маргарит во поговорот на книгата.

На македонски јазик книгата „Чудесна зима“ е објавена како дел од новиот проект на издавачката куќа „Артконект“ со наслов „Пораки на надеж: инспиративна европска литература“, поддржан од програмата „Креативна Европа“ на ЕУ. Препевот од каталонски јазик е на Нашата Сарџоска.

(Текстот е објавен во „Културен печат“ број 118, во печатеното издание на весникот „Слободен печат“ на 26-27 февруари 2022)