Во Мобилната / Монтажна галерија (локација: Парк на Франкофонијата) при Центарот за современи уметности – Скопје на 3 јуни, во 18 часот, ќе биде отворена самостојната изложба со наслов „Меѓу нас“ – визуелна приказна за емпатија, надеж и колективна грижа – на Горан Костовски – Индог.

Проектот произлегува од долгогодишното истражување на темата „Славење на животот“, започнато во 2011 година, и во оваа фаза се фокусира на емпатијата, љубовта и колективната грижа како двигатели на подобра иднина.

Преку серија илустрации, платна и графики создадени во последниве години, „Меѓу нас“ ја истражува човековата емоционална состојба и поврзаноста со природата и заедницата, инспирирана од современите глобални случувања. Централниот мотив – цветот – се појавува како симбол на раст, ранливост и трансформација, носејќи различни состојби: љубов, тага, радост и надеж.

Изложбата отвора прашања за менталното здравје, поставувајќи го како заедничка одговорност, а не индивидуална борба. Таа повикува на поврзување, дијалог и солидарност, истовремено функционирајќи како терапевтски и ангажирачки простор што поттикнува чувство на припадност и можност за промена преку мали, но значајни гестови на грижа и разбирање.

Изложбата е финансиски поддржана од Министерство за култура и туризам на РСМ и Општина Центар.

Горан Костовски – Индог е уметнички директор, илустратор, дизајнер, уличен уметник, диџеј и активист. Во својата кариера има соработувано со бројни организации, компании, музичари и уметници, реализирајќи различни креативни проекти, кампањи за подигање на свеста и визуелни идентитети. Има искуство и во областа на односи со јавноста и комуникации.

Во 2011 година ја основа DIY (Doing Yourself In) – уметничка платформа, како и унисекс етикетата „Celebrate Life“, насочена кон промоција на позитивни пораки и урбана култура. Во 2020 година го започнува својот подкаст посветен на менталното здравје, во кој досега има реализирано над 100 епизоди. Паралелно, има изложувано и настапувано во земјата и во странство.