Во наредните осум месеци најголемиот отворен канал во Струмица-Поројот „Крушевска Република”, ќе биде целосно реконструиран и покриен, а просторот над него ќе биде урбан и хориткултурен урбан простор.

Ова беше соопштено на почетокот на градежните активности, кои во првата фаза опфаќаат реконструкција на каналот од улицата „Брегалница” до улицата „Маршал Тито” во должина од три километри.

-Проектот подразбира реконструкција на истрошените делови, промена на самиот пресек на поројот, проширување на двете паралелни сообраќајници и покривање на истиот, хортикултурно уредување, осветлување и сметам дека овој комплексен проект значително ќе го промени изгледот на овој дел од градот и општо на целата Општина. Ќе претставува еден украс на нашиот град, а воедно ќе биде и заштитен од несакани појави, како што се загадување и фрлање отпадоци во него. Мислам дека ова ќе биде проект со којшто ќе се гордееме во иднина, рече градоначалникот на Струмица, Коста Јаневски.

За реализација на овој зафат Општината ќе потроши 35,5 милиони денари, обезбедени од буџетот.