Палмерстон, поранешниот „главен ловец на глувци“ во Министерството за надворешни работи на Велика Британија, почина на Бермудите. Мачорот, посвоен од засолништето за напуштени животни, беше „пензиониран“ во 2020 година, по четири години служба, пишува Би-би-си.

Во февруари 2025 година, неговиот профил на социјалните мрежи објави дека Палмерстон се вратил од пензија за нова дипломатска мисија во странство, оддалечена илјадници километри, како „советник за односи со мачки на новиот гувернер на Бермудите“.

На социјалната мрежа Икс беше објавено дека овој „исклучителен мачкин дипломат“ починал мирно на 12 февруари.

– Палми беше посебен член на тимот на гувернерот на Бермудите и многу сакан член на семејството. Тој беше прекрасен пријател, со нежна природа и многу ќе ни недостига –  се вели во објавата.

Црно-белиот мачор, именуван по виконт Палмерстон, премиер и министер за надворешни работи од 19 век, се приклучи на дипломатската служба во 2016 година.

Се исели од централната зграда на Министерството за надворешни работи во Лондон за време на пандемијата на ковид, а потоа официјално се пензионираше во 2020 година.