По трагедија на автопатот Струма во Бугарија по налог на главниот јавен обвинител започна увид во надзорот за законитоста на ознаките на патиштата и патната сигнализација на магистралните и на патните правци од прва класа на територијата на целата држава.

Увидот ќе го вршат заедно бугарски и меѓународни експерти, како и со оние од невладините организации.

Доколку има доволно докази за кривично дело од општа природа, материјалите ќе бидат испратени до врховното касационо обвинителство на преиспитување на кривично гонење на одговорни лица, соопшти државното обвинителство.

Материјалите од увидот ќе бидат испратени до Министерскиот совет со цел извршната власт да ги оствари своите овластувања и обврски според законот.

Од друга страна, тим бугарски истражители и обвинител во петок ќе поднесат барање за правна помош до скопското обвинителство и се очекува да добијат ДНК профили од роднините на загинатите заради идентификација на жртвите.

Портпаролот на главниот обвинител Сијка Милева ја истакна одличната соработка меѓу обвинителствата на Република Бугарија и Република Северна Македонија и увери дека се одржува континуирана комуникација за брза и ефикасна истрага.

Истрагата за инцидентот продолжува со распит на сведоци. Сведоштва веќе дадоа двајца од преживеаните патници во автобусот, а во текот на денешниот ден ќе бидат сослушани уште двајца од повредените, кои се на лекување во болницата Пирогов.

За предистражната постапка определени се бројни вештачења – форензички, автотехнички, противпожарно-технички и слично, како и сложени вештачења за расветлување на причините за инцидентот. Резултатите од обдукцијата на 44 жртви од сообраќајната несреќа покажуваат дека нивната смрт главно била предизвикана од задушување како последица од пожарот. Извршени се увиди на широк периметар на местото на несреќата, претстојат дополнителни прегледи на остатоците од автобусот.