Фудбалерите на АП Брера остварија екстремно важна победа во минатото коло на гостувањето во Струга, но тие бодови нема да значат премногу во трката да се избегне баражот, ако денеска не надополнат со нови три од дуелот со Работнички.

Младиот тим на Шефки Арифовски ја прекина низата лоши резултати, но сега треба да покаже и дека може во континуитет да игра на потребното ниво.

– Подготвени сме за ново надигрување. Ќе биде ова уште еден мошне тежок натпревар, затоа што и на Работнички трите бода многу му значат – стои во пораката која доаѓа од АП Брера.

Натпреварот меѓу АП Брера и Работнички ќе се игра од 16.00 часот, на стадионот „Благој Истатов“ во Струмица.

АП Брера е моментно на деветтото место со 36 бодови, додека Работнички е на 11 позиција со 29.

Во истиот термин ќе се играат уште два мечеви: Арсими – Башкими и Македонија ЃП – Тиквеш.