Писателот Томислав Османли е добитник на книжевната награда „Донат“ за животно дело
На литературна свеченост одржана во Задар, Хрватска, беа доделени годишните награди „Донат“ и „Горан Бујиќ“, кои ги доделува задарскиот оддел на Хрватското книжевно друштво – оддел Задар.
Лауреати на наградите се и четворица македонски писатели: Томислав Османли со награда за животно дело и книжевните творци Борче Панов, Даниела Андовска-Трајкова и Марина Мијаковска, како и невладината организација „Хрватско-македонска тангента“, сите наградени за видни книжевни придонеси.
Предлозите за награди до жирито пристигале од сите пет ограноци на ХКД, а конечните одлуки ги донело жири од 21 член, на чело со претседателот на задарскиот огранок на Хрватската книжевна асоцијација, предводен од писателот Никола Шимиќ Тонин, поет, романописец, драмски автор и преведувач.
– Наградата „Донат“ му се врачува на Томислав Османли, македонски писател, сценарист, драматург, теоретичар на медиуми, филмски и театарски критичар, новинар и есеист – стои во дел од подолгото образложение за високото хрватско книжевно признание – автор е на 28 книги публицистика, драмски текстови, сценарија и прози. Неговата теоретска студија „Филмот и политичкото“ (1981) е првата книга во Македонија посветена на седмата уметност, онака како што „Стрип, запис со човечки лик“ (1987, 2002) е првата книга посветена на деветтата уметност во таа земја.
Инаку, високите признанија именувани „Донат“ и „Горан Бујиќ – писатели и новинари“ се доделуваат во знак на почит и сеќавање на рано заминатиот задарски творец, новинар, писател, критичар и уредник Горан Бујиќ (род. 1955) секоја година на 28 декември, роденденот на творецот.
Годинава со двете награди се почестени четворицата македонски автори и асоцијацијата која создава бројни културни мостови меѓу Хрватска и Македонија, предводена од политикологот Сашо Георгиевски. На овој начин асоцијацијата на задарските книжевни дејци, дел на Хрватското книжевно друштво, ја потврди својата отвореност и респектот кон македонските литературни творци во доменот на романескното, поетското, мултимедиското и теоретското творештво.
Најзаслужен за тоа уважување е првиот човек на задарскиот Огранок, писателот Никола Шимиќ, како и неговите соработници од Управата и независните интелектуалци од бројниот состав на годинашното жири на наградите „Донат“ и „Горан Бујиќ“.
Заблагодарувајќи се од името на лауреатот на највисокото признание, наградата „Донат“ за животно дело на Томислав Османли ја прими Секретарот на „Хрватско-македонска тангента“, Милена Георгиевска, новинарка и уредничка на списанието „Македонски глас“ од Хрватска.
Останати добитници на наградите се авторите Марјан Пунгартник и Ана Чагаљ. Наградите се состојат од Диплома, Медалјон со ликот на Горан Бујиќ и уметничка слика/фотографија, дела на еминентни задарски уметници.