Пет причини зошто кашлицата ви трае предолго оваа зима и како да се ослободите од неа
Веројатно сте забележале дека речиси сите околу вас кашлаат, изгледа, без прекин. Како причината за кашлицата, каква и да е, никако не исчезнува туку продолжува постојано. За што се работи, односно кои се можните причини за хроничната кашлица, а и кои се можните решенија, за „Нова.рс“ раскажува доктор Никола Стојковиќ, општ лекар.
Како што вели д-р Стојковиќ, кашлањето е одбранбен механизам на нашиот организам кој овозможува исфрлање на секретот, туѓата содржина или микроорганизмите кои стигнуваат во дишните патишта. Понекогаш причините кои предизвикуваат кашлица може да останат незабележани, а доколку не се отстранат, кашлицата добива хронична форма.
Тој ги издвојува најчестите причини за хронична кашлица.
Алергии
„Во текот на зимата повеќе време поминуваме во затворени простории, затоа сме и повеќе изложени на алергени кои можат да се најдат таму. Ако сте алергични на мувла, грини од прашина и други вообичаени алергени, може да се соочите со упорна зимска кашлица. За да добиете помош, препорачливо е да се обратите кај алерголог и да направите тест за алергија. На овој начин ќе дознаете на што сте алергични и како да се држите подалеку од тие алергени. Една од терапевтските опции е десензибилизација на одредени алергени“, вели д-р Стојковиќ.
Последици од инфекција
По тешки инфекции на дишните патишта (респираторниот тракт), како што се воспаление на белите дробови (пневмонија) и грип, по лекувањето може да остане упорна кашлица.
„Може да трае со недели, па дури и со месеци. Оваа долготрајна кашлица може да укаже и на тоа дека во вашиот организам може заостанала инфекција, па се советуваат дополнителни испитувања во овие цели. Во зависност од тоа дали кашлицата е продуктивна или не, се советуваат лекови кои го олеснуваат искашлувањето) или антитусиви – лекови кои ја смируваат иритирачката кашлица).
Астма
Астмата е една од најчестите причини за упорна зимска кашлица.
„Бидејќи предизвикувачи на напад на астма најчесто се ладен воздух и иритирачки материи, можно е сувата кашлица да биде присутна во текот на целата сезона. На астматичарите им се советува редовно да ја земаат својата терапија, да избегнуваат вдишување ладен воздух и да не доаѓаат во контакт со иритирачки материи“.
Бронхитис
Бронхитисот е воспаление на дишните патишта, кој исто така, може да има и кашлица како еден од симптомите.
„Ако некое лице има хроничен бронхитис, во текот на зимата кога е сезона на настинки и грип, постои поголем ризик од повторување на оваа болест. Се препорачува редовно да се зема терапија, навремена терапија при настинки и грип, како и вакцинација против сезонски грип. Ако сте пушач, би било логично да размислувате за престанување на пушење.“
Синузитис
Една од честите причини за хронична кашлица е воспалението на синусите.
„Кај ова воспаление доаѓа до течење на секретот по задниот ѕид на ждрелото (фаринксот), што доведува до кашлање. Оваа кашлица може да биде многу упорна и иритирачка. Покрај кашлањето, може да има и чувство на чешање и пецкање во грлото, засипнатост или течење на носот. За дијагностички цели, препорачливо е да се консултирате со лекар специјалист за евентуална компјутерска томографија на синусите“.
Доколку причината е од алергиска природа, треба да се обратите кај алерголог за долготрајно да се реши овој проблем, напоменува д-р Стојковиќ.
А на сето тоа има и загадување.
На крајот, ако кашлицата никако не поминува, единствено логично е да се обратите кај специјалист кој ќе види точно која е можната причина за вас и ќе ви предложи терапија.