Здружението на лица со церебрална парализа од Велес стана лиценциран давател на социјалната услуга „Живеење со поддршка” за лица со попреченост при процес на деинституционализација на лица со попреченост од Специјалниот завод во Демир Капија.

За таа цел оваа невладина организација со финансиска поддршка преку проектот „Заедно за повеќе можности и поддршка-ТИМОР” на невладината организација CeProSARD со подршка од ЕУ, адаптира групни домови. Од овој месец се очекува да пристигнат првите пет корисника во првиот дом во Велес, информира за МИА Далиборка Златева, претседател на ова здружение.

– Со повлекувањето на овие лица од Домот во Демир Капија и нивно  сместување во групни домови во Велес, а потоа и во други градови во земјава, ќе им се овозможат сервисни услуги на локално ниво како и  24 часовна подршка од асистенти кои ќе се грижат за нив, појасни Златева.

Таа најави дека се подготвува ваков дом и во Градско, уште еден во Велес, а потоа и во село Богородица кај Гевгелија.

Воедна информира дека вчера имале посета од претставници од Atlantic Grupa во првата адаптирана куќа.

–При првата посета тие ни го врачија вредносниот чек, донација од 3800 евра. Овие средства се наменети за потребите на корисниците и функционирање на домовите.  Благодариме што сте општествено одговорна компанија, што се сетивте на нас и ја покажавте на дело хуманоста и човечноста! им порача Златева.

Извор: МИА