Во Градската библиотека „Браќа Миладиновци“ во Скопје на 3 декември се одржа разговор со поетот Ѓоко Здравески. Неговата најнова стихозбирка „Небо трето“ е книга на месецот во ГБСК и дел од четвртиот циклус на големата кампања „Читаме современи македонски автори“.

Стихозбирката „Небо трето“ во издание на „Бегемот“ е интересен спој на духовноста, спиритуалноста, медитацијата и молитвата низ автентични стихови. Разговорот со Здравески го водеше книжевната критичарка Александра Јуруковска, а стихови интерпретираше актерот Андреј Серафимовски.

– Песните во „Небо трето“ се исцелување. Соочување со себеси, но и со другите, што е особено тешко. Во основата на моето пишување е синкретизмот, сѐ што сум прочитал, знам, или сум доживеал, сето тоа излегува и низ песните. Притоа, од суштинско значење е ‘техне’ – знаењето, а потоа се гради целината. Во однос на јазикот ме интересира изворот, погледот назад, од каде доаѓаат нештата. Кога тоа го знам, полесно доаѓам до исходот – подвлече поетот Ѓоко Здравески во разговорот во ГБСК.

Ѓоко Здравески (1985, Скопје) дипломирал и магистрирал на Катедрата за македонска книжевност и јужнословенски книжевности при Филолошкиот факултет „Блаже Конески“ – Скопје. Работел како лектор по македонски јазик на Филозофскиот факултет во Ниш и на ИНАЛКО во Париз, како уредник во издавачките куќи „Бегемот“ и „Темплум“, како библиотекар на Катедрата за македонски јазик и јужнословенски јазици при Филолошкиот факултет во Скопје, а како уредник соработувал и со интернет-порталите „Репер“, „Блесок“ и „Окно“.

(Текстот е објавен во „Културен печат“ број 310, во печатеното издание на весникот „Слободен печат“ на 6-8.12.2025)