Претседателот на државата Стево Пендаровски вечерва по завршувањето на седницата во Собранието за избор на преодна Влада , во својот Кабинет ги прими членовите на новиот состав. Избраните членови од ВМРО-ДПМНЕ не дојдоа на приемот.

На членовите на преодната Влада, претседателот Пендаровски им посака ефикасно работење и успешно спроведување на претстојните парламентарни избори.

За средбата кај претседателот Пендаровски информираше и новоизбраниот премиер Талат Џафери.

„Особено е важно државните гранки да функционираат координирано и постојано да соработуваат во корист на граѓаните и државата. Денес претседателот Пендаровски организираше прием во чест на новоизбраната Влада“, напиша Џафери на „Фејсбук“.

Преодната Влада беше избрана на денешната 141. пленарна седница со 65 гласа „за“ и тројца „против“. Преодната Влада се избира на 100 дена пред изборите, а има мандат до официјалното објавување на резултатите од претстојните парламентарни избори закажани за 8 мај, односно до формирањето на новата влада.