Кошаркарите на Пелистер имаа проблеми да го совладаат видно изменетиот и ослабен состав на Работнички (88:85) во рамките од 12. коло во МТЕЛ Супер лигата.

На истекот на првото полувреме битолчани имаа водство од 47:44. Во продолжението на натпреварот во салата „Боро Чурлевски“ во Битола, сличен развој на играта. Домаќините имаа постојано водство, а највисоката позитива со која се стекнаа беше шест поени (53:47), кога се играше 23. минута.

Но упорните гости успеаја да ја поништат, дојдоа и до „егал скор“. По тројката на Ефремовски беше нерешено, (60:60), момент од 27. минута. До крајот на овој период од играта, „зелено-белите“ повторно се одвоија, имаа солидни 71:65. На почетокот на последниот период, по тројката на Митревски се стекнаа со највисоките 74:65.

Работнички не се предаде, напротив, постојано притискаше, како и во претходните три четвртини од натпреварот. На неполни четири минути пред крајот, заостануваа само „половина кош“ (79:80). Нешто подоцна, по поените на Наков стигнаа до 81:82. Сепак, потегот на вечерта го имаше Никола Малешевиќ, кој на нешто повеќе од една минута до крајот, погоди за три поени, и на Пелистер му обезбеди недостижни 87:83. Наредните два обиди (за три поени) на Ефремовски беа неуспешни па бодовите останаа во Битола.

Во домашната екипа, која сега е на ефект (8-4), Дејвис реализираше 25 поени и девет скока. Малешевиќ дојде до учинок од 21 поен, пет скока и четири асистенции. Новото име во редовите на „црвено-белите“ Лука Петровски имаше 19 поени и пет скока, додека Робев застана на 17 поени и седум асистенции.

МТЕЛ СУПЕР ЛИГА-МАЖИ

12 коло

Пелистер – Работнички 88:85

Маџари – МЗТ Скопје Аеродром 76:87

Ангели – Феникс 2010 60:99

Тиквеш Голден Игл – Гостивар 81:73

МКК Куманово – Чаир 2030 (прекин)

26. ЈАНУАРИ (ПОНЕДЕЛНИК)

16.00: ТФТ – Кожув

Сала „Наум Наумовски-Борче“ – Скопје

ТАБЕЛА

1. МЗТ Скопје А. 12 11 1 909:772 22

2. ТФТ 11 10 1 894:765 21

3. Пелистер 12 8 4 1095:954 20

4. МКК Куманово 11 7 4 925:857 18

5. Кожув 11 7 4 895:880 18

6. Маџари 12 6 6 978:963 18

7. Работнички 12 5 7 983:991 17

8. Феникс 2010 12 5 7 918:928 17

9. Тиквеш ГИ 12 4 8 948:986 16

10. Чаир 2030 11 4 7 870:931 15

11. Гостивар 12 2 10 859:982 14

12. Ангели 12 1 11 779:1043 13