Пратеникот Диме Велковски од СДСМ, како и Павле Трајанов од Демократскиот сојуз, се меѓу пратениците кои не гласаа за заклучоците околу францускиот предлог за почнување пристапни преговори со ЕУ, кој денеска беше усвоен од Собранието , а потоа и од Владата.

ДС соопшти дека лидерот на партијаата не гласал за предлогот.

„На денешната седница на македонскиот Парламент, на која се расправаше за Францускиот предлот (Преговарачка рамка), Павле Трајанов, претседател на Демократскиот сојуз и пратеник, НЕ гласаше за заклучоците предложени од СДСМ и ДУИ. Од говорницата порача да се гласа за заклучоците што тој ги предложи, со кои се задолжува Владата да се заложи во Преговарачката рамка да се вгради став за македондкиот јазик, да се изостават билатералните прашања и историските теми, како и Протоколот. Потоа да има една меѓувладина конференција за почнување на преговорите со ЕУ, а вградувањето на Бугарите во Уставот да биде на реципрочна основа, односно Бугарија да ги признае правата на Македонците кои живеат во Бугарија“, соопштија од ДС.

ДС цврсто стои на определбата Македонија да стане полноправна членка на ЕУ, но согласно европските принципи и стандарди и Копенхагенски критериуми,кои целосно ги исполнува, додаваат од партијата.

Како што претходно најави, за предлогот не гласаше и Маја Морачанин од ДОМ, партија која исто така е дел од владејачкото мнозинство во Собранието. Меѓу пратениците кои гласаа за предлогот ги нема ниту Зијадин Села од Алијанса за Албанците, како и двајца пратеници на Беса.