Паралелно со Самитот на неврзаните, Вучиќ денес го отвори саемот на оружје „Партнер 2021″

Српскиот претседател Александар Вучиќ/Фото: Jure Makovec / AFP / Profimedia

Паралелно со одржувањето на Самитот на неврзаните во Белград, каде учествуваат делегации од над 100 земји од целиот свет, српскиот претседател Александар Вучиќ денес го отвори Саемот за оружје и воена опрема „Партнер 2021″, јави дописникот на МИА од Белград.

На саемот присутни се вкупно 132 излагачи од кои 36 се од 16 странски земји, а Русија е претставена со 25 компании.

На отворањето на Саемот „Партнер 2021″, претседателот на Србија, Александар Вучиќ, кажа дека Србија ќе продолжи да ја зајакнува војската и да ја развива одбранбената индустрија.

-Во светот на интересите, не постои милостиња за слабите, туку почит кон силните, и затоа е важно да ја развиеме одбранбената индустрија, нагласи Вучиќ.

Тој посочи дека на годинашниот саем прикажани се досега најмногу новини.

-Успеавме во претходните години армијата и воената индустрија да ги ставиме на пиедесталот на довербата на луѓето. Тука се претставени капацитетите за истражување, тестирање и ремонт на Министерството за одбрана и нашата одбранбена индустрија, како и највисоките достигнувања на Југоимпорт и нашите институции, чија задача е да ја опремат и обучат армијата, рече Вучиќ.

Тој нагласи дека е тешко да се спротивстави на големите сили во промоцијата на воена опрема и оружје, но дека е важно Србија да го изгради својот пат и да ги избере оние области каде што може да се натпреварува со најдобрите.

На саемот беше претставено новото мултифункционално оклопно возило „Лазански”, како најсофистицирано и најмодерно тешко оклопно возило, развиено од компанијата „Југоимпорт СДПР”. Тоа е всушност модифицирана верзија на постоечкиот „Лазар 3″, а главна разлика помеѓу „Лазар” и „Лазански” е повеќенаменскиот топ за дејствување по жива сила, лесни оклопни возила и фортификации.

 

Извор: МИА

Почитуван читателу,

Нашиот пристап до веб содржините е бесплатен, затоа што веруваме во еднаквост при информирањето, без оглед дали некој може да плати или не. Затоа, за да продолжиме со нашата работа, бараме поддршка од нашата заедница на читатели со финансиско поддржување на Слободен печат. Станете член на Слободен печат за да ги помогнете капацитетите кои ќе ни овозможат долгорочна и квалитетна испорака на информации и ЗАЕДНО да обезбедиме слободен и независен глас кој ќе биде СЕКОГАШ НА СТРАНАТА НА НАРОДОТ.

ПОДДРЖЕТЕ ГО СЛОБОДЕН ПЕЧАТ.
СО ПОЧЕТНА СУМА ОД 60 ДЕНАРИ

Видео на денот