Палестинскиот претседател Махмуд Абас во средата повика на „цврст“ одговор од американската администрација и од меѓународната заедница на неодамнешните израелски мерки насочени кон заострување на контролата на Израел врз окупираниот Западен Брег, објави „Анадолија“.

„Овие опасни прекршувања бараат цврст одговор од американската администрација и меѓународната заедница зашто ги попречуваат напорите на претседателот (Доналд) Трамп, го кршат меѓународното право и ги поткопуваат палестинските државни институции и решението со две држави,“ изјави Абас на заедничка прес-конференција во Осло со норвешкиот премиер Јонас Гар Сторе.

Тој рече дека во разговорите со норвешкиот премиер се разгледувале напорите за зацврстување на прекинот на огнот во Газа и за потребата да се премине кон спроведување на втората фаза од планот на Трамп.

Во неделата, израелскиот безбедносен кабинет одобри мерки насочени кон проширување на нелегалната изградба на населби и кон зголемување на контролата на Тел Авив врз окупираниот Западен Брег.

Нетанјаху бара од Трамп во нуклеарниот договор да се вклучи и иранската ракетна програма

Според израелските медиуми, одлуките вклучуваат укинување закон што ја забрануваше продажбата на земјиште на Западниот Брег на нелегални израелски доселеници, отворање на евиденциите за сопственост на земјиштето и префрлање на надлежноста за издавање градежни дозволи во еден населбен блок во близина на Хеброн од палестинска општина на израелската цивилна администрација.

Абас повика на „итна и ефикасна европска и меѓународна акција за запирање на анексијата и на ширењето на населбите и за повикување на израелската влада на одговорност за тековните прекршувања за да се зачува кредибилитетот на меѓународниот систем заснован на почитување на меѓународното право и Повелбата на ОН“.

Тој ги повика Норвешка, ЕУ, САД и другите глобални актери да извршат притисок врз Израел „да ја прекине финансиската војна и да престане со незаконските одземања од палестинските даночни приходи, со што се ограничува способноста на владата да ги исполнува своите обврски кон палестинскиот народ“.

Абас ја потврди единственоста на палестинската територија и ги отфрли сите шеми за раздвојување на Појасот Газа од Западниот Брег, повикувајќи на целосно израелско повлекување од Газа и на овозможување на палестинската влада да ги извршува своите надлежности на целата палестинска територија.

Тој потврди дека општинските избори ќе се одржат во април, а парламентарните во ноември.

Израел го зголеми интензитетот на операциите на Западниот Брег, вклучително и во Источен Ерусалим, откако ја започна воената кампања во Газа на 8 октомври 2023 година.

Палестинците ја гледаат ескалацијата – вклучувајќи убиства, апсења, раселувања и проширување на населбите – како чекор кон формална анексија на територијата.

Израелската војска уби седуммина луѓе во Газа, вели дека „удира прецизно“