Ова мора е шега: Ибрахимовиќ лут поради Кулушевски!
Швеѓаните не се толку лути поради поразот, туку поради една одлука на нивниот селектор, Јане Андерсон. Фудбалерот со македонско потекло Дејан Кулушевски е член на најдобрата шведска репрезентација, а од оваа година е дел од Јувентус.
Се очекуваше дека ќе се најде во стартниот состав на Шведска за дуелот со светскиот шампион, но немаше место за Кулушевски. Тој доби шанса да игра во последните 20 минути, но не успеа многу да промени на резултатски план.
– Одлуката ми беше чудна, но морав да ја почитувам. Се надевав дека ќе се променат нештата со моето влегување на теренот. Но, бев шокиран што не се најдов во стартниот состав, се чувствував одлично на тренингот пред мечот – вели Кулушевски.
Еве ја и реакцијата на неговиот селектор:
– Има квалитет, ќе видиме дали ќе добие повеќе минути во вторник (против Португалија). Дали сега можеме да зборуваме за оние кои играа? Мислам тоа е многу поинтересно – рече Андерсон.
И еден од најдобрите шведски фудбалери Златан Ибрахимовиќ го гледаше новиот настап на репрезентацијата и воедно го даде својот коментар на социјалните мрежи, незадоволен поради одлуката Кулушевски да биде на клупата.
– Ова мора да е шега. Нови докази дека неспособни луѓе на погрешни места го гушат шведскиот фудбал – напиша Ибра.