Италијанскиот тенисер Флавио Коболи денеска се пласираше во полуфиналето на Ролан Гарос за прв пат во својата кариера откако го победи Канаѓанецот Феликс Оже-Алијасим со 3:1 (4:6, 6:4, 6:4, 6:4) во четвртфиналето за три часа и 26 минути.

Канаѓанецот го отвори мечот подобро и го доби првиот сет откако направи два и претрпе еден брејк. Вториот сет беше со иста ситуација, но во корист на Италијанецот, за 1:1 во сетови.

Во третиот и четвртиот сет, на Коболи му беше потребен по еден брејк за да постигне целосен пресврт и победа и прво полуфинале на кој било грен слем турнир во неговата кариера.

Коболи в петок ќе игра во полуфиналето против победникот од дуелот меѓу Матео Беретини и Матео Арналди, па Италија сигурно ќе има финалист на Ролан Гарос. Вториот полуфинален пар е Александер Зверев – Јакуб Меншик.