Европскиот суд на правдата (ЕСП) пресуди дека авиокомпаниите мора да ги надоместат провизиите на посредниците, како што се страниците за резервација на билети, во случај на откажување на летови, дури и ако не биле свесни за точниот износ, објави денес Шпигел. Страниците за резервација на авио билети, како што се Qiwi, Opodo, Flug24 и други, досега им наплаќале на патниците провизија дури и во случај на откажување на летови.

Според пресудата на ЕСП, авиокомпаниите мора да ги надоместат провизиите на посредниците ако летовите се откажани. Со оваа одлука, судот во Луксембург ја зајакнува заштитата на патниците кои резервираат билети преку портали за онлајн резервации, според германскиот весник. Во еден конкретен случај, патниците купиле авионски билети од Виена до Лима со холандската авиокомпанија KLM, преку веб-страницата на туристичката агенција Opodo, објави германскиот весник. Откако летот бил откажан, KLM ја вратил цената на билетот, но задржал околу 95 евра, што Opodo ги наплатил како провизија.

Случајот дојде пред Врховниот суд на Австрија, кој го упати случајот до Европскиот суд на правдата за разјаснување. Највисокиот суд на ЕУ веќе пресуди во 2018 година дека авиокомпаниите мора да им ги надоместат на своите патници не само цената на нивните билети, туку и надоместоците за резервација од трети страни, но само ако биле свесни за овие провизии.

Како што објасни судот во Луксембург, не е важно дали авиокомпанијата го знае точниот износ на провизијата и мора да ја плати ако прифати посредникот да издава авионски билети во негово име и за негово име. Во тој случај, може да се претпостави дека компаниите се свесни за практиката на посредниците да наплаќаат провизии, кои претставуваат „неизбежна“ компонента од цената на билетот и затоа се сметаат за одобрени од авиокомпанијата, наведува весникот.