Османи ги повика граѓаните да не потклекнуваат на провокации на утрешното чествување за Гоце Делчев
Со апел до јавноста за мирно и достоинствено чествување на 4 февруари, денот на кој се одбележува 151-годишнината од раѓањето на македонскиот револуционер Гоце Делчев денеска се огласи и министерот за надворешни работи Бујар Османи.
– На 4 февруари кога се поклонуваме пред гробот на Гоце Делчев, се поклонуваме пред неговото визионерство за културен натпревар меѓу народите. Повикувам на достоинствено, мирно чествување на денот кога оддаваме почит на неговиот идеал за напредни општества, и за градење цивилизациски вредности, порача Османи во видео-обраќањето објавено на Фејсбук.
Во своето обраќање до јавноста Османи рече дека секој граѓанин на Република Бугарија и на која било друга држава, е добредојден во Северна Македонија, нагласувајќи дека секој мора да се однесува со почит кон нашата држава и кон македонскиот народ.
– Да покажеме зрелост и да не дозволиме да се подгрева национализам преку говор на омраза и омаловажување. Ние сме држава која има европска перспектива. Со својата традиција на меѓуетнички дијалог, кохезија и мирно решавање на билатерални спорови, сме пример во светот. Ве повикувам да опстоиме на тие наши вредности, нагласи Османи.
Тој апелираше до граѓаните да не дозволат да потклекнат на провокации, со цел да се заштитат интересите на државата.
– Да не дозволиме провокатори и киднапери да ни ја киднапираат европската иднина или да го влошат имиџот што го изградивме како држава. Ова е во интерес на сите граѓани и на заедничкиот напредок, додаде Османи.